नाशिक येवला प्रतिनिधी माधव नेहे
संगमनेर:- तालुक्यातील सावरगावतळ येथील जंगलाला बुधवारी रात्रीच्या सुमारास अचानकपणे लागलेला वणवा युवकांच्या शर्थीचे प्रयत्ना मुळे हजारो एकर वनसंपदा वाचविण्यास यश मिळाले आहे. सावरगावतळ गावास खूप मोठी वनसंपदा लाभली असून जवळपास आठशे हेक्टर पेक्षाही अधिक क्षेत्रावर येथे दाट जंगल आहे. या जंगलात विविध प्रकारचे झाडे झुडपे याचबरोबर अनेक दुर्मिळ वनौषधी वनस्पती असून जंगली प्राणी,पशु पक्षी ,श्वापदे यांचा मोठ्या प्रमाणावर वावर आहे. गावकरी आणि वनविभाग येथे सातत्याने वृक्षारोपण करत आपली वनसंपदा अधिक संपन्न करण्याच्या प्रयत्न करत आहे.
परंतु बुधवारी रात्री 8.30 वाजेच्या सुमारास अचानकपणे येथील डोंगर क्षेत्रावरील काही भागातील जंगलाला अचानकपणे मोठा वणवा लागला. ह्या वनव्याने पाहता पाहता मोठे उग्र रूप धारण केले होते. गावातील अनेक तरुणांनी या आगीची, वनव्याची माहिती पोलीस पाटील गोरक्ष नेहे आणि सरपंच दशरथ गाडे यांना कळविली. पोलीस पाटील नेहे यांनी जंगलाला लागलेल्या वनव्याची माहिती तातडीने वनविभागाच्या अधिकारी यांच्याबरोबर तहसीलदार यांनाही कळविली. पोलीस पाटील आणि सरपंच यांनी गावातील वनसंपदेवर आलेले हे आरिष्ट समजून गावातील युवकांना वणवा विझविण्यासाठी मदतीचे आवाहन करताच जवळपास दोनशे ते अडीचशे युवक वणवा विझविण्यासाठी वनव्याच्या दिशेने धावले.
तातडीने वनक्षेत्रपाल निलेश आखाडे, वनपाल रामदास डोंगरे, वनपाल शेखर पाटोळे, वनरक्षक चैतन्य कासार, वनरक्षक गजानन पवार, अरुण यादव शिपाई पुनाजी मेंगाळ, काशिनाथ दुधवडे यांची टीमही घटनास्थळी मदतीसाठी पोहचली. तहसीलदार अमोल निकम पोलीस पाटील व वनविभागाच्या अधिकारी यांच्या वणवा पूर्णपणे विझेपर्यंत सातत्याने संपर्कात राहून मदतीसाठी प्रयत्न करत होते. रात्रीची वेळ,घनदाट जंगल आणि तीव्र डोंगर उतारावर ही आग लागल्याने आणि त्यात जोराची हवा यामुळे हा वणवा आटोक्यात आणणे खूप अवघड होत होते. परंतु गावातील या सर्व अडीचशे तरुणांनी आणि वन अधिकारी कर्मचारी यांनी चार तासाच्या अथक प्रयत्नाने हा वणवा पूर्ण आटोक्यात आणल्यानेया जवळपास दहा हेक्टर वरील वनसंपदा जरी जळून गेली असली तरी उर्वरित वनसंपदेवरील मोठे आरिष्ठ टळले गेले.
