हिवरखेड प्रतिनिधी जितेश कारिया
दिनांक 23 एप्रिल रोजी रात्री हिवरखेडचे ठाणेदार धीरज चव्हाण आणि त्यांचे सहकारी हे बेलखेड गावामध्ये पेट्रोलिंग करीत असताना त्यांना गुप्त माहिती मिळाली की बेलखेड बस स्टँड जवळ तेल्हारा येथून हिवरखेड कडे एक इसम टाटा कंपनीच्या टिप्पर मध्ये नदीमधील रेती चोरून घेऊन येत आहे. अशा खात्रीलायक बातमी वरून पोलिस सदर ठिकाणी पाळत ठेवून असताना तेल्हारा कडून हिवरखेड कडे टाटा 407 टिप्पर येताना दिसला म्हणून पोलिसांनी टिप्पर चालकास थांबण्याचा इशारा केला असता त्यामध्ये एक ब्रास रेती किंमत अंदाजे पाच हजार रुपयांची दिसून आले.
म्हणून पोलिसांनी टिप्पर चालकास नाव विचारले असता त्याने त्याचे नाव अशोक समाधान तायडे वय 45 राहणार रायखेड असे सांगितले. त्याला रेती परवाना बाबत विचारपूस केली असता त्याने रेती वाहतूक परवाना नसल्याचे सांगितले. त्यावरून सदर टिप्परची पंचांसमक्ष पाहणी करून पोलिसांनी टिप्पर क्रमांक एम एच 28 एबी 3763 आणि रेती असा एकूण दहा लक्ष पाच हजार रुपयांचा मुद्देमाल जप्त करून हिवरखेड पोलीस स्टेशनला वाहन लावण्यात आले. आणि आरोपी अशोक समाधान तायडे याला ताब्यात घेऊन कोर्टात हजर केले असता कोर्टाने त्याला एक दिवसाची पोलिस कस्टडी सुनावली.
